Shaukat Shabbir
شاہدخاقان عباسی نے پریزائیڈنگ افسران کے غائب ہونے پرسوال اٹھادیا
نون ليگ نے ڈسکہ الیکشن میں مبینہ دھاندلی کی سماعت عوام اور کیمروں کے سامنے کرنے کا مطالبہ کرديا۔ شاہد خاقان عباسی نے 20 پریزائیڈنگ افسران کے غائب ہونے پر بھی سوال اٹھا دیا۔
حکومت کی طرح ن لیگ بھی ڈسکہ الیکشن جیتنے کی دعویدار ہے، این اے 75 کے ضمنی انتخاب میں مبینہ دھاندلی کیخلاف مسلم لیگ ن کے رہنماء الیکشن کمیشن بھی پہنچ گئے۔
شاہد خاقان عباسی نے میڈیا سے گفتگو میں بڑا مطالبہ بھی کردیا، کہتے ہیں کہ این اے 75 میں ڈاکہ ڈالا گیا، الیکشن کمیشن خود کہہ رہا ہے کہ اس الیکشن میں دھاندلی ہوئی، مسلم لیگ ن کی فتح کو شکست میں تبدیل کرنے کی بھونڈی سازش کی گئی، اس لئے ہم کہتے ہیں کہ جو ہیئرنگ ہو وہ عوام کے سامنے ہو، ٹی وی کیمروں کے سامنے ہو۔
ڈسکہ سے لیگی امیدوار نوشین افتخار بھی الیکشن کمیشن سے نتائج کی طلبگار ہیں۔ انہوں نے کہا کہ ای سی پی ہمیں انصاف دے۔
